محشى ورق العنب الشامى المزز بدبس الرمان بالتفصيل بكل الأسرار بالخطوات المصورة

نقدم اليوم لعشاق الطهي طريقة عمل ورق العنب المزز على الطريقة الشامية بدبس الرمان والتمر هندى من مطبخ الشيف سامح صدقى بالصور والخطوات فلنتابع :

يقول الشيف : سنة 2013 كلت ورق عنب فى مطعم لبنانى ومن يوميها مبقتش عارف اكل اى ورق عنب تانى .. عايز اقولكم الطريقة دى عيشتنى نفس التجربة .. بنفس الطعم ... كفاية ان حماتى اديتنى فيه ختم الجودة جربوه كدا واوعدكم انكم مش هاتبطلوه ... ربنا يعزأهل الشام ويجبر كسرهم

المكونات:

أولآ مكونات خلطة حشوة ورق العنب الشامى : 

ورق عنب مغسول - 2 كوب رز ابيض مغسول ومنقوع ربع ساعة ومتصفى - 2 بصلة متوسطة مفرومة - 2 طماطم مفرومين - معلقة صلصة كبيرة - بقدونس وكسبرة وشبت - ربع كوب زيت زيتون - توم مفروم - نعناع ناشف - 2 م ص ملح - 1م ص من (فلفل اسود - كسبرة ناشفة - بابريكا ) 1/2 م ص (شطة - فلفل ابيض) 1/4 م ص قرفة

اقرئى أيضآ:
محشى كوسا باللبن بالخطوات المصورة

الحمام المحشى بالفريك من مطبخ بيرو بالخطوات المصورة
 

ننزل فى بولة بالرز

الطماطم " مفرومة بالسكينة قطع صغيرة"

البصل نفس الكلام مفروم بالسكينة

الخضرة

معلقة كبيرة توم مفروم

نعناع ناشف

البهارات

زيت الزيتون

معلقة كبيرة صلصة

ونقلب الخليط كله كدا

لحد ما يبقى شكله كدا - ممكن طبعا نزود لحمة مفرومة متعصجة بس انا مش بحب اى محشى فيه لحمة

نفرش حلة بورق عنب ممكن بشرايح بطاطس ومرة حطيت نص فرخة متقطعة قطع بعضمها

نحضر بقى حلة فيها مية سخنة وجنبها مية باردة وياريت لو عندنا تلج

نجيب شوية ورق بشوية ننزلهم فى المية بتغلى

ونغطسهم بالشكل دا لمدة 30 ثانية

ونرجع ننزلهم فى المية الباردة والتلج عشان توقف التسوية وتحافظ على لونه أخضر وجميل

بنجيب ورقة وننزل في طرفها من تحت بمعلقة صغيرة من الحشو ... جالى تعليق " نسيت تقول ان واحنا بنلف الورقة نخلي الخشن من جوا و الناعم من برا زي ما ماما علمتني " انا فعلا كنت ناسي

ونقفل عليها من تحت بالشكل دا ونلف عادى من اليمين ونقفل من الشمال ونلف

وهايطلعوا معانا كدا

انا بحب ارصهم كدا ... ونروح نعمل الصوص بتاعه

هنا بقى اللعب كله والابداع كله ... هانجيب ربع كوب زيت زيتون وزيهم دبس رمان وزيهم عصير ليمون بس نسيت اصوره - معلقتين كبار صلصة ... ونجم الحفلة الأستاذ تمر هندى ودا مش بيبان طعمه زى مانتو متخيلين .. بس بيدى مزازة عالمية

فى 3 كوب مية بننزل بالصلصة - ممكن نستخدم شوربة بس هايبقى فيها ملح اكيد ساعتها مش هانحط ملح فى الخلطة .. اوعوا تنسو الملح هنا او هنا

زيت الزيتون

دبس الرمان

الليمون

الأستاذ تمر هندى "حتة صغيرة " ممكن نستغنى عنه لو مزعلكم بس trust me عالمى

ونرفعه على النار يتكتك كدا مع بعضه

ونغطى المحشى بطبق بالشكل دا

ونصفى السائل كله فى نص الطبق وهو هايقوم بتوزيعه من الجوانب ... لحد ما الصوص يغطى المحشى

ممكن كمان نتقل عليه ببولة وفيها شوية مية

ونغطى عليه ونسيبه على نار عالية لمدة ربع ساعة .. وننقله على نار هادية اوى لمدة من ساعة لساعة ونص او زى مانتو متعودين ونطفى عليه ونسيبه متغطى من 4-6 ساعات لحد اما يبرد خاااالص... نخلى بالنا بقى من حاجة مهمة ... ممنوع منعا باتا نكشف عليه ولا نقول طب ندوقه بس نشوفه استوى ولا لأ .. هايكون استوى فى الوقت اللى قلنا عليه ... ونعمل بقى شوية سلطة زبادى عشان الدنيا تحلو ... قسما بالله جعت وانا بكتب :)

وبالهنا والشفا

صاحب الوصفة : الشيف سامح صدقى

كلمات بحث : ورق العنب الشامي - ورق عنب الشامي- ورق عنب الشام - ورق العنب بالطريقه الشاميه - حشوة ورق العنب الشامي - حشوة ورق العنب الشاميه - خلطة ورق العنب الشامي - ورق عنب بالطريقه الشاميه - ورق العنب المزز - طريقة عمل ورق العنب المزز - ورق العنب بالصور- ورق العنب بالتمر الهندي - ورق العنب بالصور خطوه خطوه - ورق العنب بالتمر الهندي ودبس الرمان- ورق العنب بالتمر - ورق عنب بالتمر العندي - ورق عنب حامض بالتمر الهندي

siege auto